Raporto pri la vizito
de la
E-geamikoj el Forchheim en la ĝemelita urbo Gherla (Rumanio) dum junio
2004
Okaze de la oficiala vizito de la
komitatanoj el la ĝemelita urbo Forchheim (Germanio) al Gherla (Rumanio), mi
raportas al vi pri la belegaj tagoj kiujn ni travivis kune.
Gherla kaj Forchheim estas ĝemelaj urboj ekde la jaro 2000 kiam, oficiale
oni subskribis la dokumenton kiu atestas la ĝemelon.
La Esperanto grupo en Gherla apartenas ankaŭ al la Asocio Gherla Forchheim
kaj estas en bonaj rilatoj al la Esperanto Asocio el Forchheim. E-membroj de
la ambaŭ asocioj partoprenas kune en diversaj E-aranĝoj.
Ĵaŭdo, la 24-an de iunio, alvenis en Gherla delegacio de la Asocio el
Forchheim. Venis la prezidanto de la asocio - sinjoro Kading Gerhard, la
tradukisto - sinjoro Taran Aleksandru, la prezidantino de la Esperanto
Asocio en Forchheim - sinjorino Evelin Geist kaj sinjoro Josef Wilka -
E-membro.
Vendredo okazis kunsido ĉe urbodomo en Gherla, ni estis invititaj de sinjoro
urbestro mem. Sinjorino Evelin Geist parolis en Esperanto kaj gratulis
sinjoron urbestron pro la elekto kiel urbestro de la urbo Gherla. Sinjoro
urbestro dankis kaj promesis helpi la Esperanto- Grupon en Gherla.
Sabato, ĉiuj membranoj de la Asocio estis invititaj partopreni ĉe kunsido,
ĉe Urba Muzeo, organizita de prezidanto de la Asocio Forchheim-Gherla.
Partoprenis pli ol 25 personoj inter kiuj 14 esperantistoj el Gherla. Oni
analizis la agadon de la ambaŭ asocioj, mi priparolis pri la agado de la
Esperanto- Grupo, pri niaj sukcesoj, pri nia partopreno en diversaj
E-aranĝoj landen kaj eksterlanden. Vespere ni iris en restoracion kie ni
manĝis, trinkis, kantis kaj sentis bonege.
Dimanĉo, la Esperanto- Grupo en Gherla invitis la gastojn viziti la
ĉirkaŭaĵon, ni iris al la kabano de nia E-amiko kie ni ĝuis pri la belecoj
de la naturo, ni distris kaj ni parolis nur esperanten. Ĉiuj estis tre
kontentaj.
Lundo, ni vojaĝis al Vatra Dornei - mia naskiĝurbo, fama kaj belega
ripozloko en Rumanio. La vetero estis bela, ni promenis kaj vizitis multajn
interesajn lokojn. Ni vizitis ankaŭ la novan katedralon en Vatra Dornei,
kies muroj estas belegaj surpentritaj.
Mardo matene ni promenis tra la urbo Gherla, ni vizitis kelkajn magazenojn
kaj, post la tagmanĝo, la geamikoj el Forchheim komencis la revojaĝon al
Germanio. Ili bonorde alvenis hejmen kaj mia amikino tuj raportis al mi pri
la belegaj tagoj en Gherla.
MARIANA BERARIU
GHERLA
RUMANUJO
